சிரிப்பூ

எந்தப் பூவும்
இத்தனை
அழகாய்
சிரிப்பதில்லை
உன்னைத் தவிர...

ஒரு கோப்பைக் காதல்

ஒரு கோப்பைக் காதல்
நம்முடையது ..
அக்கோப்பையே
இவ்வுலகமாயின்...!!!!

படைப்பு

எல்லாருக்காகவும்
யாரோ ஒருவர் எங்கோ
படைக்கப்படுகிறார்கள் ...
எனக்கு மட்டும்
தேவதையாக ... !!!

கவிதை

மூன்று வார்த்தைகளில்
ஒரு கவிதை
சொல்லமுடியுமா
என்றாய்...

"நீ
நான்
காதல்"
என்றேன்
வியந்து பார்க்கிறாய்...

இது என்ன பிரமாதம்
ஒரு வார்தையில்கூட
கவிதை சொல்வேன்
"நாம்"
என்று...

வெட்கம்

கைக்குட்டை போல்
கண்ணோடு வைத்திருக்கும
உன் வெட்கத்தை இன்றாவது
சிறை பிடித்திட எண்ணினேன்...
கள்ளச்சிரிப்பை விடுத்து
உதிர்த்த வெட்கத்தை
அள்ளிச்சென்றாய்
வழக்கம்போல் ...

நீ

தேவதையாய்
பிறந்து
ராட்சசியாய்
இருப்பவள் நீ...
என் அழகு ராட்சசி...!!!

நீ எங்கேயோ இருக்கிறாய்

எட்டிப்பார்த்து
இம்சிக்கிறாய்

திரும்பிப்பார்த்து
தவிக்கவிடுகிறாய்

கடந்துசென்று
கொல்கிறாய்

சிறு புன்னைகையில்
சிதறடிக்கிறாய்

கண் அசைவில்
கலவரம் செய்கின்றாய்

இவ்வனைத்தையும்
எங்கிருந்தோ செய்யும்
வித்தையை
எங்கிருந்து கற்றாய்...

நீ எங்கேயோ
இருக்கிறாய்..

வாழ்க்கை

சொந்த ஊருக்கு செல்வதிலேயும்
சென்று வந்தபின்
திரும்ப செல்லும் நாட்களை
கணக்கிடுவதிலேயும்
கழிந்துவிடுகின்றன
வாழ்க்கை...!!!

ஆனாலும்
பேருந்தோ புகைவண்டியோ
பிடிக்க ஓடும் தருணங்களிலும்
திரும்பும் வேளையிலும்
தொண்டையில் ஏற்படும்
சொல்ல முடியாத சோகத்திலும்
கண்ணோரம் வழியும் கண்ணீரிலும்
உணர்கிறேன் வாழ்க்கையின்
ஆனந்தங்களை....!!!

நினைவுகள்

நண்பன் வந்து
தோளைத் தட்டியே பின்பே
தெரிகிறது...
நான் பேசிக்கொண்டிருப்பது
உன்னுடன் அல்ல
உன் நினைவுகளுடன் என்று...

கனவு

நீயோ
கனவாகவே
இருக்கின்றாய்...
ஆனால் எந்த கனவும்
உன்போல்
இனிமையாய்
இருப்பதில்லை....

மொழி பெயர்ப்பு

எந்த மொழியையும் மாற்றம்
செய்யும் கூகிள் கூட
வெட்கி தலை குனிகிறது
உன் மௌன மொழியை
பெயர்க்க முடியாமல்...

வெளிநடப்பு

உன்னைப்பற்றிய சிந்தனைகளை
வெளியே வைத்துவிட்டு
உன்னைப்பற்றி ஒரு கவிதை
எழுத நினைக்கின்றேன்...
ஆனால் வார்த்தைகளோ
உனக்காக வெளிநடப்பு செய்கின்றன...

உலகம்

உலகத்தின் அத்தனை
ஓரங்களிலும்
ஓடிச் சென்று பார்க்கிறேன்
எங்கும் நீயே நிற்கிறாய்....
பிறகுதான் புரிந்தது
உன்னையே
சுற்றிக்கொண்டிருக்கிறேன் என்று....

பரிசு

எனக்கான எந்தப் பரிசும்
உயர்வாய் இருந்துவிடப்
போவதில்லை
உன்னை விட...

காதல் குறள்

கற்க கசடற
என்கிறது குறள்
கற்க கடைசிவரை
என்கிறது காதல்

என் மனம்

உற்றோக்கன்றி உரியோரிடம்
சேரும் மடந்தை போன்றது
என் மனது

என்றுமே உனக்கானது...

உறவு

உறவு என்கின்ற உணர்வு
உதிரத்தில் கலக்காதவரை
பாசம் என்பது
நியாயவிலைக்கடை பொருளின்
எடை போன்றது தான்....

வாழ்க்கை

கொஞ்சம் நீ
கொஞ்சம் நான்
நிறைய காதல்
கலந்து செய்தது
நம் வாழ்க்கை...

கொஞ்சல்

உனைப் பார்த்ததும்
ஓடி வரும்
இரண்டு உயிர்களுள்
ஒன்றை மட்டும்
எடுத்து கொஞ்சுகிறாய்...

அடுத்த முறையாவது
உன் நாய்க் குட்டியை விடுத்து
என் காதலை எடுத்துக்கொள்

நீ

தனிமையான இரவுகள்
தனியாக கழிவதில்லை
என்னுடன் நீ

தேவதை

தேவதைகள் தனியே
பூமிக்கு வருவதில்லை
உன்னைத் தவிர....

நீ

நீ
என் கனவு
உன் நினைவுகளோ
என் வாழ்க்கை

கொண்டாட்டம்

வேலன்டைன்க்குத் தெரியாது

காதல் தினம் கொண்டாடப்படும் என்று...

ஷாஜகானுக்குத் தெரியாது

தாஜ்மஹால் காதல் சின்னமாகக்

கொண்டாடப்படும் என்று...

உனக்குத் தெரியாது

உன்னை நான் எப்படிக்

கொண்டாடுவேன் என்று...